هاموت واكلمك واسمع صوتك فى ودنى

هاموت واكلمك



هاموت واكلمك واسمع صوتك فى ودنى
هاموت نفسى المسك واحس بيك حاضنى
مش عارف لية متردد مش عارف اية مانعنى
خايف تكون نسيتنى او مش عايز تفتكرنى
.................................................. ......
حاسس انك واحشنى مش عارف اية حايشنى ارجع واعيش معاك
يمكن خايف تحاسبنى او لما تشوفنى تسبنى ومينفعش اجرى وراك
ولا مكسوف لما تعاتبنى وتقول لية كدة يا ابنى انا مت يا ابنى فداك
او يمكن خايف تسامحنى وبكل سهولة تغفرلى وارجع واعيش وياك
.................................................. .....................................
انا عارف انى تعبتك ياما جرحتك وسبتك وانت عمرك ما سبتنى
عمرى فى يوم ما فهمتك وكانى ابدا ما عرفتك وانت عمرك ما خذلتنى
وفى كل لحظة فى حياتى كنت بقسى عليك ليلاتى وانت ياما سامحتنى
وعلى قد حبك ليا كنت بتهون عليا مش عارف طبع فيا ولا بحبك عودتنى
.................................................. ........................................
حاجة بتقولى انسى مش عارف حب نفسى ولا ضعف شخصيتى
بنسى اللى عملتة معايا من البداية للنهاية فى لحظة خطيتى
شوية نفسى ارجع وبعيد عنك انا بارجع واتوة فى دنيتى
بس خلاص يا ربى عايزك تيجى وتلمس قلبى وتمحى اميتى
.................................................. .............................
وواثق انك هتقدر تغير قلبى المحجر بقلب يحس بيك
وان يوم فكرت اسيبك يصرخ يقول حبيبك ازاى يهون عليك
وان يوم ضعفت ارادتى وجة الشر عندى هاحتمى يا رب فيك
هاخليك هدفى وغايتى وكلامك هيكون وسيلتى علشان اوصل اليك
.................................................. .....................................



هارسمك جوة قلبى ذى ما انت راسمنى يا رب على كفيك
وبيك هتزيد عزيمتى وكمان تكمل حكايتى وقصة حبى ليك
ولا يوم تانى ابعد عنك ولا حد ياخدنى منك وافضل ماسك فى ايديك
ولا حد يقدر يلمسنى او بالوحدة يحسسنى وانا عايش جوة عنيك