قصيده الواو للمبدع بشري عجبان

قصيده الواو للمبدع بشري عجبان

الفرق .. بين الكنيسة و المجتمع .. واو
بس الناس عندها إحساس إن الواو ده حرف خطير
وإن أساس الامن في باب وإن السور محتاج لغفير
والبواب يلزمله دولاب واللي يبات هنجيبله سرير
والدواليب محتاجه رقيب لو بقوا خمسه .. عايزه مدير
واللي يكسل ولا يغيب يبقى حسابه مر عسير
واللي حيمرض مش يخرج إحنا نجيبله ليمون وعصير
وإن حكمت حنجيبله طبيب وحنبني مستشفى كبير
ونشيد مدرسه وحضانه وحنزرع وحنحفر بير
وندرّب جيجي ودميانه يعملوا قش الرز .. حصير
ونجيب كارو يلم الغلة ومعيز وفراخ وحصنة وحمير
واللي يعوز يخرج يتسلى عندنا مصيف وتايم شير
عندنا كرة .. عندنا سلة عندنا تمثيل عندنا تصوير
واللي وحيد حنحطه في شله واللي بعيد حنجبله شفيير
ومورستان لو جالكوا جنان وبيت عميان لو فيكو ضرير
ودار أيتام و .. مُسنين ومكتب توظيف أو تهجير
عندنا بوفيهات .. عندنا بوتيكات عندنا جرنان ورئيس تحرير
عندنا قنوات من غير تشفير عندنا كارتون عندنا فوازير
عندنا باصات وميكروباصات ومنادي يقول تعا واحد الدير
عندنا تتويج .. عندنا تقدير عندنا تفريج عندنا تشهير
عندنا تهريج.. بيلياتشو حكيم عندنا تعظيم عندنا تحذير
عندنا تحليل عندنا تحريم عندنا تكريم .. عندنا تكفير
عندنا كانتين فاطرين صايمين عندنا جاهز أو ع التأشير
عندنا جيمين بشوَر وبسين عندنا سيبر نت وتأجير
عندنا تكييف عندنا بطاطين عندنا تغليف عندنا تصوير
عندنا تكرير .. عندنا تقطير تغير تعمير تكبير تنوير
ومراكب وسفارة وبوق ونشيد وعلم وتاريخ تحرير
ومكاتب وإدارة وسوق ورئيس ورئيس وزرا ووزير
يعني بره "تبيكال" جوه ويبقى المشوار هو هوه يبقى الفرق بين الكنيسة والمجتمع .. إيه؟؟ واو
الفرق بين جوه وبره : سور وباب.
أما الناس هما الناس .. والأصحاب هما الأصحاب
أطفال صبيان أو شبان اولاد وبنات أو شباب
الفرق بين شخص داخل وشخص خارج .. إنه تاب ..
أو متبش .. قلبه محجر .. مش بيرق
لا متحكمش ولا تقررش تاب ولا لأ..
يبقى الداخل زي الخارج ... والتغير مش منظور
وقلنا الناس هما الناس ... بنفس المنــطق والدستور
فتحيا كنيسة أم النور ... لاجل الواو والباب والسور
يحيا الواو الواو الواو ... يحيا الواو والبـاب والسور
تسقط الاعتبارات الواهيه.. تسقط روح الخدمة تغور
يذهب قلب الفرد في داهيه .. يبقى الشكل العام مستور
أنهي مسيح؟؟ فيه تصاريح.. فيه مفاتيح .. فيه منشور
أنهي صليب؟؟ فيه ترتيب.. فيه دواليب.. صف طابور
مش أناجيل!! بقى تساجيل .. بقى تماثيل.. نار وبخور
.........................................
قبل ما تفهم إن أنا بقصد .. أنـقد أي نشاط أو أثور
افهم إني بحــاول أرصد .. إن الجوهـر بقى مغمور
أصل إتقال إن الله اتجسد.. لاجل قـلوب الناس البور
بس الفكرة ياعيني اختُذلت بقت الواو والباب والسور!!